मुंब्रा पोलिसांची धडाकेबाज कामगिरी: रिक्षावरच्या ‘आई’ शब्दाने उलगडलं ३ महिन्यांच्या बाळाच्या अपहरणाचं गूढ; अकोल्यातून सुटका

ठाणे: मुंब्रा पोलिसांनी एका अत्यंत क्लिष्ट आणि संवेदनशील प्रकरणाचा छडा लावत ३ महिन्यांच्या चिमुकलीची सुखरूप सुटका केली आहे. अवघ्या एका शब्दाच्या धाग्यावरून पोलिसांनी हे मिशन फत्ते केले. रिक्षाच्या मागे लिहिलेल्या ‘आई’ या एका शब्दाने पोलिसांना आरोपींपर्यंत पोहोचण्यास मदत केली आणि ६ दिवसांच्या अथक प्रयत्नांनंतर बाळाला त्याच्या खऱ्या आईच्या कुशीत परत आणता आले.
​नेमकी घटना काय?
मुंब्रा येथील २३ वर्षीय फर्जाना मन्सूरी या आपल्या दोन मुलींसह २२ जानेवारी रोजी बाजारात गेल्या होत्या. खरेदी करून परतत असताना एका मुलीला त्यांनी कडेवर घेतले होते, तर दुसरी तीन महिन्यांची मुलगी त्यांच्यासोबत होती. रस्ता ओलांडताना फर्जाना यांना त्रास होत असल्याचे पाहून एका बुरखाधारी महिलेने मदतीचा बहाणा केला. “मी पण समोरच जात आहे, बाळाला माझ्याकडे द्या,” असे सांगून तिने ३ महिन्यांच्या आफियाला आपल्या कडेवर घेतले. गर्दीचा फायदा घेत आणि फर्जाना यांचे लक्ष विचलित झाल्याचे पाहून त्या महिलेने बाळासह पोबारा केला.
​’आई’ शब्दाने दिली दिशा
बाळ दिसेनासे झाल्यावर घाबरलेल्या मातेने मुंब्रा पोलीस ठाण्यात धाव घेतली. पोलिसांनी तात्काळ तपासाची चक्रे फिरवली. परिसरातील सीसीटीव्ही फुटेज तपासले असता, ती बुरखाधारी महिला एका रिक्षात बसून पळून गेल्याचे दिसले. मात्र, रिक्षाचा नंबर स्पष्ट दिसत नव्हता. पोलिसांनी हार मानली नाही. त्यांनी शेकडो सीसीटीव्ही फुटेज बारकाईने तपासले. यात एका फुटेजमध्ये त्या रिक्षाच्या मागे ‘आई’ हा शब्द लिहिलेला आढळला.
​हाच धागा पकडून पोलिसांनी मुंब्रा परिसरातील अशा रिक्षांचा शोध सुरू केला. त्यातून संबंधित रिक्षाचालकाचा पत्ता लागला. रिक्षाचालकाने दिलेल्या माहितीनुसार, त्याने त्या महिलेला मुंब्रा रेल्वे स्थानकावर सोडले होते.
​अकोल्यातून आरोपींना अटक
पुढील तपासात पोलिसांना समजले की, आरोपी महिला आणि तिचा पती रेल्वेने अकोल्याच्या दिशेने गेले आहेत. मुंब्रा पोलिसांच्या एका विशेष पथकाने तातडीने अकोला गाठले. स्थानिक पोलिसांच्या मदतीने त्यांनी अकोल्यातील खेटरी गावातून मोहम्मद मुजीब गुलाब (३१) आणि त्याची पत्नी खैरूनिसा (३०) या दाम्पत्याला ताब्यात घेतले. त्यांच्याकडून अपहृत बाळाची सुखरूप सुटका करण्यात आली.
​गुन्ह्याचे कारण
पोलिसांनी दिलेल्या माहितीनुसार, आरोपी दाम्पत्याला लग्नानंतर अनेक वर्षे होऊनही मूलबाळ होत नव्हते. स्वतःचे मूल नसल्याने आलेल्या नैराश्यातून त्यांनी हे अपहरण केल्याचे कबूल केले. बाळ मिळवण्यासाठी ते मुंब्रा परिसरात आले होते आणि संधी मिळताच त्यांनी हे कृत्य केले.
​सहा दिवसांच्या या थरारानंतर बाळाला सुखरूप पाहून पालकांच्या डोळ्यात आनंदाश्रू तरळले. मुंब्रा पोलिसांच्या या तत्परतेचे आणि तपास कौशल्याचे सर्वत्र कौतुक होत आहे.
​टीप: बातमीतील व्यक्तीचा फोटो मूळ (Original) आहे. फोटोच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.