ठळक बातमी: रांगोळीत यात्रेच्या दिवशीच थरार; तरुणाचा पाठलाग करून निर्घृण खून

कोल्हापूर/इचलकरंजी: इचलकरंजी शहरालगत असलेल्या रांगोळी (ता. हातकणंगले) गावात बिरदेव यात्रेच्या उत्साहात असतानाच एका तरुणाचा निर्घृण खून झाल्याने खळबळ उडाली आहे. गुरुवारी (२९ जानेवारी) रात्री साडेनऊच्या सुमारास ही धक्कादायक घटना घडली. शुभम कुमार सादळे (वय २७, रा. काळम्मावाडी वसाहत, रांगोळी) असे मृत तरुणाचे नाव आहे.
​नेमकी घटना काय?
रांगोळी गावात बिरदेव यात्रा सुरू असल्याने गावात उत्साहाचे वातावरण होते. मिळालेल्या माहितीनुसार, शुभम याचे टू-व्हीलर सर्व्हिसिंग सेंटर आहे. गुरुवारी त्याने दुकान बंद केले आणि रात्री मित्रांसोबत यात्रेत फेरफटका मारला. त्यानंतर तो काळम्मावाडी वसाहतीजवळील मोकळ्या जागेत (स्मशानभूमी परिसर) मोबाईलवर बोलत उभा होता.
​याच वेळी दुचाकीवरून आलेल्या दोन ते तीन अज्ञातांनी अचानक त्याच्यावर धारदार शस्त्राने हल्ला चढवला. जीव वाचवण्यासाठी शुभमने घराच्या दिशेने पळ काढला, मात्र हल्लेखोरांनी त्याचा पाठलाग करत त्याच्यावर वार केले. वर्मी घाव बसल्याने तो रस्त्यातच कोसळला. रक्ताच्या थारोळ्यात पडलेल्या शुभमला तातडीने इचलकरंजी येथील रुग्णालयात दाखल करण्यात आले, परंतु डॉक्टरांनी त्याला तपासून मृत घोषित केले.
​पोलिस तपास आणि कारवाई:
या घटनेची माहिती मिळताच शिवाजीनगर आणि हुपरी पोलिस ठाण्याचे अधिकारी घटनास्थळी दाखल झाले. पोलिसांनी घटनास्थळावरून हल्लेखोरांनी वापरलेली काही हत्यारे आणि गॉगल जप्त केल्याचे समजते. प्राथमिक तपासात आणि परिसरातील सीसीटीव्ही (CCTV) फुटेजच्या आधारे संशयितांची ओळख पटल्याची माहिती असून पोलिस त्यांचा शोध घेत आहेत. या हत्येचे नेमके कारण अद्याप स्पष्ट झालेले नाही, मात्र पूर्ववैमनस्यातून हा प्रकार घडला असावा, असा प्राथमिक अंदाज वर्तवला जात आहे. ऐन यात्रेच्या काळात घडलेल्या या रक्तरंजित घटनेमुळे रांगोळी गावात भीतीचे वातावरण निर्माण झाले आहे.
​टीप: बातमीतील व्यक्तीचा फोटो मूळ (Original) आहे. फोटोच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.