जालन्यात वाळू माफियांची दहशत; तहसीलदाराचा मोबाईल हिसकावून अंगावर गाडी घालण्याचा थरारक प्रयत्न

जालना जिल्ह्यात वाळू माफियांची मुजोरी आणि दहशत दिवसेंदिवस वाढत चालली असून, आता त्यांनी थेट प्रशासकीय अधिकाऱ्यांच्या जीवावर उठण्यापर्यंत मजल मारली आहे. जिल्ह्यातील राजूर परिसरात अवैध वाळू वाहतूक रोखण्यासाठी गेलेल्या महसूल विभाग आणि पोलिसांच्या संयुक्त पथकावर वाळू तस्करांनी हल्ला केल्याची अत्यंत धक्कादायक घटना समोर आली आहे. या घटनेत माफियांनी चक्क जाफराबादच्या तहसीलदारांच्या हातातील मोबाईल हिसकावून घेतला आणि त्यानंतर घटनास्थळावरून पळून जाण्यासाठी अधिकाऱ्यांच्या अंगावरच भरधाव वेगातील हायवा (ट्रक) घालण्याचा प्रयत्न केला. या प्रकारामुळे संपूर्ण जिल्ह्यात खळबळ उडाली आहे.
​मिळालेल्या सविस्तर माहितीनुसार, ८ फेब्रुवारीच्या रात्री ११ वाजेच्या सुमारास सहायक जिल्हाधिकारी बी. सरवनन यांना अवैध वाळू वाहतुकीबाबत गुप्त माहिती मिळाली होती. या माहितीची दखल घेत तहसीलदार ज्ञानेश्वर काकडे आणि जाफराबादचे प्रभारी तहसीलदार मंगेश साबळे यांच्यासह एका पथकाने खासगी वाहनातून टेंभुर्णी रोडवर सापळा लावला होता. यावेळी समोरून येणारा वाळूने भरलेला हायवा ट्रक पथकाने अडवला. मात्र, ट्रक थांबताच चालक आणि त्याच्यासोबत असलेल्या १० ते १२ जणांच्या टोळक्याने गोंधळ घालण्यास सुरुवात केली.
​घटनास्थळी उपस्थित असलेल्या जाफराबादचे तहसीलदार मंगेश साबळे यांनी संपर्क साधण्यासाठी आपला मोबाईल बाहेर काढला असता, तिथे उपस्थित असलेल्या विजय टोम्पे नावाच्या आरोपीने त्यांच्या हातातील मोबाईल बळजबरीने हिसकावून घेतला. तसेच, “तुम्ही आमचे काहीही वाकडे करू शकत नाही, तुम्ही नोकरी कशी करता हेच आम्ही बघतो,” अशा शब्दांत अधिकाऱ्यांना दमदाटी केली. माफियांची ही अरेरावी इथेच थांबली नाही, तर दुसऱ्या एका चालकाने ट्रकमध्ये बसून तो ट्रक थेट महसूल पथकाच्या अंगावर घालण्याचा प्रयत्न केला. सुदैवाने, उपस्थित अधिकाऱ्यांनी आणि कर्मचाऱ्यांनी वेळीच बाजूला उडी मारल्यामुळे मोठा अनर्थ टळला आणि सर्वांचे प्राण वाचले. मात्र, या गदारोळात वाळू माफिया पळून जाण्यात यशस्वी झाले.
​या गंभीर प्रकाराची दखल जिल्हाधिकारी आशिमा मित्तल यांनी तातडीने घेतली असून, वाळू तस्करांवर एमपीडीए (MPDA) अंतर्गत कडक कारवाई करण्याचे आणि तडीपारीचे आदेश दिले आहेत. या प्रकरणी हसनाबाद पोलीस ठाण्यात गुन्हा दाखल करण्यात आला असून, पोलिसांनी कारवाई करत एक हायवा ट्रक जप्त केला आहे आणि गणेश सुरेश पालोदे या आरोपीला अटक केली आहे. उर्वरित मुख्य आरोपींचा शोध पोलीस घेत आहेत.
​टीप: बातमीतील व्यक्तीचा फोटो मूळ (Original) आहे. फोटोच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.